ગુજરાતમાં તારીખથી તોફાની પવન સાથે ભારે વરસાદની આગાહી : હવામાન વિભાગે બે તારીખ આપી
ગરમી વચ્ચે ગુજરાતમાં ભારે પવન અને વરસાદની આગાહી કરવામાં આવી છે. હવામાન વિભાગે આગામી સપ્તાહથી દક્ષિણ ગુજરાતમાં પવન સાથે હળવો વરસાદ થવાની આગાહી કરી છે. જે ગુજરાતના ખેડૂતો માટે સારા સમાચાર છે. આ વર્ષે ગુજરાતમાં ચોમાસું બે દિવસ વહેલું આવશે. હવામાન વિભાગે કહ્યું કે આ વર્ષે ચોમાસું સારું રહેશે.
8-9 જૂને વરસાદ પડશે
હવામાન વિભાગે ગુજરાતમાં પ્રિ-મોન્સુન વરસાદની આગાહી કરી છે. હવામાન વિભાગના વૈજ્ઞાનિક રામાશ્રય યાદવે જણાવ્યું કે રાજ્યમાં 8-9 જૂને વરસાદ પડશે. અમદાવાદમાં બે દિવસ વાદળછાયું વાતાવરણ રહેશે. ગઈકાલે અમદાવાદમાં મહત્તમ તાપમાન 42 ડિગ્રી નોંધાયું હતું. તો ગાંધીનગરમાં તાપમાન 41.5 ડિગ્રી રહ્યું હતું. રાજ્યમાં સૌથી વધુ 43 ડિગ્રી તાપમાન સુરેન્દ્રનગરમાં નોંધાયું હતું.
8મીએ ક્યાં વરસાદની આગાહી?
વલસાડ, નવસારી, ડાંગ, તાપી, નર્મદા, છોટાઉદેપુર, દમણ, દાદરા નગર હવેલી, ગીર સોમનાથ અને દીવ અને સામાન્ય વરસાદની આગાહી છે.
9મીએ ક્યાં વરસાદની આગાહી?
પંચમહાલ, દાહોદ, ગીર સોમનાથ, જૂનાગઢ, અમરેલી, ભાવનગરમાં સામાન્ય વરસાદની આગાહી
પવન વધતાં ગરમીમાં ઘટાડો થયો હતો
પવનની દિશા બદલાવાને કારણે રાજ્યમાં ગરમીમાં ઘટાડો થયો છે. રાજ્યમાં ગરમી હવે ધીરે ધીરે વિદાય લઈ રહી છે. અરબી સમુદ્રમાંથી રાજ્ય તરફ પવનની ઝડપ વધી છે. હાલમાં ગુજરાતમાં 25/30 કિમી પ્રતિ કલાકની ઝડપે પવન ફુંકાયો છે. આ સાથે રાજ્યમાં એક સપ્તાહમાં પ્રિ-મોન્સુન એક્ટિવિટી શરૂ થઈ જશે. પવન સાથે ભેજ વધવાથી છૂટાછવાયા વરસાદની શક્યતા છે. દક્ષિણ ગુજરાતના કેટલાક વિસ્તારોમાં વરસાદની શક્યતા છે. આ વર્ષે રાજ્યમાં 1 થી 2 દિવસ બાદ ચોમાસું શરૂ થશે.
આ દિવસથી પ્રિ-મોન્સુન વરસાદ શરૂ થશે
હવામાનશાસ્ત્રી અંબાલાલ પટેલે રાજ્યમાં પ્રિ-મોન્સુન એક્ટિવિટીની આગાહી કરી છે. જે હવે જૂનના પ્રથમ સપ્તાહથી જ શરૂ થશે. અંબાલાલ પટેલે જણાવ્યું હતું કે જૂનના પ્રથમ સપ્તાહમાં દક્ષિણ ગુજરાતના વલસાડ, ડાંગ સહિતના વિસ્તારોમાં પ્રિ-મોન્સુન એક્ટિવિટી હેઠળ વરસાદ પડી શકે છે. મધ્ય ગુજરાતના કેટલાક ભાગોમાં વરસાદ પડી શકે છે. જેમાં આણંદ, વડોદરા, નડિયાદ સહિતના વિસ્તારોમાં વરસાદ પડી શકે છે. ધંધુકા, ભાવનગર અને દક્ષિણ સૌરાષ્ટ્રના ભાગોમાં વરસાદ પડી શકે છે. અમદાવાદ, ગાંધીનગરમાં પ્રિ-મોન્સુન એક્ટિવિટીને અસર થઈ શકે છે. તો પંચમહાલ અને સાબરકાંઠાના કેટલાક ભાગોમાં પ્રી-મોન્સુન એક્ટિવિટી હેઠળ વરસાદ પડી શકે છે.
4 જૂન સુધીમાં સમગ્ર ગુજરાતમાં વરસાદ
અંબાલાલ પટેલે વધુમાં જણાવ્યું હતું કે રાજ્યમાં ચક્રવાતી તોફાન સાથે વરસાદ પડી શકે છે. 4 જૂન સુધીમાં રાજ્યભરમાં વરસાદનું આગમન થઈ શકે છે. રોહિણી નક્ષત્રના ઉત્તરાર્ધમાં વરસાદને કારણે ચોમાસું સારું રહેશે. એકાદ મહિના પછી રાજ્યમાં સારો વરસાદ પડશે.