રૂપાલાના સમર્થનમાં આવ્યા કડવા પાટીદારો સોશિયલ મીડિયા પર કરી રહ્યા છે પોસ્ટ..ક્ષત્રિયો કરતા પાટીદારો પરિણામ માટે વધુ નિર્ણયક

રાજકોટની લોકસભા બેઠક માટે ભાજપના ઉમેદવાર પુરુષોત્તમ રૂપાલાએ ક્ષત્રિય સમાજ વિશે વિવાદાસ્પદ નિવેદન કર્યા બાદથી વિરોધનો સામનો કરવો પડી રહ્યો છે. જો કે આ નિવેદન બાદ રૂપાલાએ ક્ષત્રિય સમાજની માફી માંગી હતી, પરંતુ તે પછી પણ તેમની ટિકિટ કેન્સલ કરવાની માંગ ઉઠી છે. ત્યારે મહિલા કોંગ્રેસ અગ્રણીઓની ટીમ દ્વારા શહેરમાં અલગ અલગ જગ્યાએ રૂપાલાના બહિષ્કારના પોસ્ટર લગાવવામાં આવ્યા છે. તો કડવા પાટીદારો સોશિયલ મીડિયા પર રૂપાલાના સમર્થનમાં પોસ્ટ કરી રહ્યા છે. આ ઉપરાંત હવે ભાજપના સભ્ય એવા અંબરીશ ડાર પણ મેદાનમાં ઉતર્યા છે.'

રૂપાલાના વિરોધમાં ક્ષત્રિય સમાજની માંગ હવે રાજ્યવ્યાપી અને ત્યાંથી દેશવ્યાપી બની રહી છે જે રાજ્યભરમાં થઈ રહી છે. ભારતીય જનતા પાર્ટી માટે આ રૂપાલાને બદલવું કે નહીં તે ગળામાં અટવાઈ ગયેલી ગાંઠ સમાન બની ગયું છે.

ભાજપના આંતરિક સૂત્રોના જણાવ્યા મુજબ રૂપાલાની બદલીથી પાટીદાર સમાજ નારાજ ન થઈ જાય તેવી દહેશત છે. જોકે, સૌરાષ્ટ્રમાં પાટીદાર અને ક્ષત્રિય સમાજ વચ્ચેની સામાજિક લડાઈ બે દાયકા જૂની છે, જો પરષોત્તમ રૂપાલાને બદલવામાં આવે તો આ લડાઈ ભાજપની મુશ્કેલીમાં વધારો કરી શકે છે.

ક્ષત્રિયો કરતાં પાટીદારો પરિણામો અંગે વધુ નિર્ણાયક છે
પરષોત્તમ રૂપાલાની ઉમેદવારી પાછી ખેંચવાની માંગ પ્રબળ બની છે પરંતુ આ નિર્ણય ભાજપ માટે ઘણો મુશ્કેલ સાબિત થઈ શકે છે. ક્ષત્રિય સમાજનો દાવો છે કે જો ભાજપ દ્વારા આ નિર્ણય પાછો ખેંચવામાં નહીં આવે તો તેઓ ગુજરાતની 8 બેઠકો પર નિર્ણાયક ભૂમિકા ભજવશે, પરંતુ આ વાત થોડી અતિશયોક્તિપૂર્ણ છે. લોકસભાની ચૂંટણીમાં ક્ષત્રિય સમાજ ભાજપને કોઈ પણ બેઠક પર સીધું મોટું નુકસાન કરે તેવી શક્યતા બહુ ઓછી છે, પરંતુ રૂપાલાની ટિકિટ રદ થતાં પાટીદાર સમાજ નારાજ થશે તો ભાજપને મોટું નુકસાન વેઠવું પડી શકે છે.