તમારા પાન કાર્ડ પર તો કોઈ બોગસ કંપની નથી ચલાવી રહ્યું છે? તમારા નામે GST રજિસ્ટ્રેશન થયું છે કે નહીં આ રીતે ચેક કરો

પાન કાર્ડનો ઉપયોગ નાણાકીય બાબતોને લગતા કામમાં થાય છે. તેનો ઉપયોગ માત્ર બેંક ખાતા ખોલવા અને આવકવેરા રિટર્ન ભરવા માટે જ થતો નથી, પરંતુ હવે તેને આધાર સાથે લિંક કરવું પણ ફરજિયાત બની ગયું છે. તેનો ઉપયોગ GST નોંધણી માટે પણ થાય છે. આ એક ખૂબ જ મહત્વનો દસ્તાવેજ હોવાથી હવે તેનો આર્થિક છેતરપિંડીમાં મોટાપાયે ઉપયોગ થઈ રહ્યો છે. ખાસ કરીને બોગસ કંપનીઓ બનાવવામાં. તાજેતરમાં જ મધ્યપ્રદેશના ગ્વાલિયરમાં રહેતા ચંદનના પાન નંબરનો ઉપયોગ કરીને તેની જાણ વગર દિલ્હીના એક સરનામે પેઢી ઉભી કરી હતી અને આ બોગસ કંપનીએ રૂ.9 કરોડથી વધુનો ધંધો પણ કર્યો હતો. ITR ફાઇલ કરતી વખતે ચંદનને ખબર પડી કે તેના પાન કાર્ડ દ્વારા GST નંબર લેવામાં આવ્યો છે.

ગયા વર્ષે નોઈડા પોલીસે એક ટોળકીનો પણ પર્દાફાશ કર્યો હતો જે લોકોના પાન કાર્ડની મદદથી GSTN નંબર લઈને બોગસ કંપનીઓ ખોલતી હતી. નોઈડા પોલીસે આ કેસમાં 18 લોકોની ધરપકડ કરી હતી અને તેમની પાસેથી 6 લાખ લોકોના પાન ડેટા જપ્ત કર્યા હતા. આરોપીઓએ તેનો ઉપયોગ 3 હજારથી વધુ GST રજિસ્ટ્રેશન કરાવવા માટે કર્યો હતો. આવી સ્થિતિમાં દરેક વ્યક્તિએ પોતાના પાન કાર્ડને લઈને સતર્ક રહેવું જરૂરી બની ગયું છે. જો તમારા નામે નકલી GST નોંધણી છે, તો તમે GST ચોરીના આરોપમાં પકડાઈ શકો છો.

આ રીતે GST રજીસ્ટ્રેશન તપાસો

તમે ઘરે બેઠા સરળતાથી જાણી શકો છો કે તમારા પાન કાર્ડ પર GST રજિસ્ટ્રેશન થયું છે કે નહીં. આ માટે તમારે તેની સત્તાવાર વેબસાઇટ www.gst.gov.in પર જવું પડશે. તમારો PAN નંબર દાખલ કરીને, તમે જાણી શકો છો કે તમારા નામે GSTN નંબર લેવામાં આવ્યો છે કે નહીં.

-સૌ પ્રથમ સત્તાવાર પોર્ટલ https://www.gst.gov.in પર જાઓ.
-આ પછી સર્ચ ટેક્સપેયર પર ક્લિક કરો.
-વિકલ્પમાં સર્ચ બાય PAN પર ક્લિક કરો.
-અહીં તમને બે બોક્સ મળશે, જેમાં પહેલા PAN નંબર દાખલ કરો.
-બીજા ખાલી બોક્સમાં આપેલ કેપ્ચા કોડ દાખલ કરો.
-બંને વિગતો દાખલ કરો અને શોધ બટન પર ક્લિક કરો.
-હવે તમને તે PAN થી સંબંધિત તમામ GSTIN/UIN નંબર વિશે માહિતી મળશે.
-તેનાથી તમે જાણી શકશો કે તમારા PAN પર કોઈએ નકલી રજીસ્ટ્રેશન કરાવ્યું છે કે નહીં.